P50 cancellation fee ng Grab, iimbestigahan ng LTFRB

Bubusisiin ng Land Transportation Franchising and Regulatory Board (LTFRB) ang ipinatutupad na P50 penalty ng Grab para sa mga pasaherong nagkakansel ng kanilang biyahe.

Sinabi ni LTFRB chair Martin Delgra na ipinabatid na ito sa kanila ng Grab subalit walang kompletong detalye kung bakit sila naniningil ng cancellation fee. Bukod dito, rerebisahin din ng board ang bagong fare policy ng kompanya.

Ipinaalam ni Grab President Brian Cu ang pagpataw nila ng cancellation fee upang makalikha ng mas magandang ride-hailing ecosystem kung saan kapwa magiging responsableng gumamit ng kanilang platform ang mga pasahero at drayber.

Sa ilalim ng bagong polisiya, kung kinansel ng isang GrabCar passenger 5 minuto makaraang makakuha ng drayber o nabigong magpakita sa kanilang tagpuan limang minuto pagkatapos dumating ng drayber, papatawan ang pasahero ng P50.

Sisingilin ang multa sa susunod na nagbayad ng cash ang pasahero.

Maaari ring masuspinde ang account ng pasahero ng 24 oras kung nagkansela sila ng dalawang beses sa loob lamang ng isang oras, tatlo sa isang araw o limang ulit sa isang linggo.

Hindi naman gagana ang multa kung nagkansela ang drayber sa loob ng 5 minuto, kung hindi dumating ang drayber sa pickup point o kung nahuli sila ng 15 minuto o higit pa sa inaasahang oras ng pagdating.

Mare-refund naman ang mga maling cancellation fee sa loob ng 48 oras.

Hindi rin makakagamit ng kanilang platform ang mga drayber na bigla na lamang nagkakansela ng passenger bookings o namimili kung saan ang biyahe kung lumabis sila sa pagbalewala o kansela ng requests.

Tatanggap naman ang mga pasahero ng 30 reward points bilang konsuelo de bobo.

Kotongan sa PITX, bubusisiin ni Poe

Nangako si Senadora Grace Poe na iimbestigahan nilang mabuti sa Senado ang sinasabing iregularidad sa Parañaque Integrated Terminal Exchange (PITX) kung saan may ilegal na kolektahan ng pera kapalit ng prangkisa ng mga public utility vehicles (PUVs).

Sa naganap na hearing noong Miyerkules sa Senate committee on public services na pinamumunuan ni Poe, ibinulgar ng pangulo ng Samahan ng mga Malls Integrated Transport Terminal na si Mar Valbuena ang lagayang nangyayari sa PITX.

“Yung miyembro po namin iniipon po nila [PITX members] para mapangakuan po ng makakapasok kayo sa PITX. Kailangan lang magbigay kayo ng ganitong amount. Ang sinasabi po niya eto sigurado mabibigyan kayo ng prangkisa,” reklamo ni Valbuena.

Idinagdag ni Valbuena na humihingi ang mga opisyales ng PITX sa kanilang mga PUV operators ng P250,000 para makapag-apply sila ng prangkisa.

“Merong mga tao sa PITX sisingilin kami ng P250,000 per franchise. Paano namin mababawi itong P250,000? Tapos naghuhulog pa kami para sa aming sasakyan,” anang pangulo ng transport group.

Sa pagkakataong ito, hinimok ni Poe na maglabas ng ebidensiya ang grupo upang maaksiyonan ng Senado ang katiwaliang nagaganap sa PITX.

“To be fair, you should present evidence. ‘Di lang puwede ang hearsay. Kung meron kayong video, kung may witness ganitong oras, meron bang CCTV,” sabi ni Poe sa hearing.

Mariin namang tinanggihan ni Atty. Marcelo Salud, PITX transport marketing consultant, ang mga akusasyon ng transport group.

“Wala pong nagongolekta. Idine-deny namin lahat iyan. Kaya po namin tinutulungan lahat ng gusto mag-apply ng prangkisa,” paliwanag ni Salud.

Naniniwala naman si Land Transportation Franchising and Regulatory Board (LTFRB) chief Martin Delgra, na dumalo rin sa nasabing pagdinig sa Senado, na pinagmumulan talaga ng korupsiyon ang pagbebenta o paglipat ng prangkisa samantalang dapat na libre lamang ito.

“One of the source of corruption is sale and transfer. ‘Yung pagbebenta ng prangkisa, we put a stop to that because that’s against public policy and a privilege given for free should not be sold for something valuable,” sabi ni Delgra.

Nag-isyu na noon pa man ang LTFRB ng Memorandum Circular No. 2016-010 para ipagbawal ang pagtanggap ng application for sale and transfer of certificate of public convenience (CPC) mapaboluntaryo man o hindi.

Ginawa ito ng ahensiya upang maitigil ang komersiyalisasyon ng CPC sa nakasanayang pagbebenta ng prangkisa para pagkakitaan.

E-Dyipni papatay sa road icon na “King of the Road”

Kilala ang bansang Japan sa labis na pagpahalaga sa kanilang kultura. Mula sa sining ng paggawa ng tsaa, kabuki o ang klasikong sayaw at drama hanggang sa makabagong Japanese video game icon na si Mario, masasabing mataas ang kanilang pagpapahalaga sa kanilang kasaysayan.

Gayunman, ang bansang Pilipinas ay masasabing bayan ng madaling maniwala para sumunod sa dikta ng ng mga bansang kanluran.

Base sa direktiba ng Land Transportation Office (LTO) at Land Transportation Franchising and Regulatory Board (LTFRB), unti-unti nang itinakda ng adminisrasyong Duterte ang pag-phase out sa mga dating jeepney na de-krudo para makatulong sa pagpapahalaga ng kalikasan. Continue reading “E-Dyipni papatay sa road icon na “King of the Road””