Norte, lalong naging solido kay Sen. Grace Poe

Sa pangangampanya sa mga lalawigan ng Cagayan at Isabela, sinalubong si Sen. Grace Poe ng matibay na espiritu ng mga Pilipino na hindi kayang igupo ng bagyo, tagtuyot at maging ng lindol na yumanig sa Gitnang Luzon.

Sa Isabela, makikita natin na walang bagyo o tagtuyot na kayang gumapi sa ispiritu ng Pilipino. Kung pagtitiwalaan ninyo akong muli, maaasahan ninyong kasama ninyo ako sa pagsusulong ng mga proyektong makatutulong sa mga kababayan nating Isabelano,” sabi ni Poe sa kanyang Facebook account.

Nauna rito sa Cagayan, dinumog ang senadora ng kanyang mga tagasuporta na nagsidagsa sa kanyang paglilibot sa nasabing lalawigan, partikular sa kabiserang Tuguegarao City.

“Mainit man ang panahon at nililindol tayo, pero matatag ang pundasyon ng hangarin nating maglingkod sa inyo.

Salamat, Tuguegarao!” dagdag ni Poe.   

Maglalagare si Poe ngayong Huwebes, Abril 25, sa Ilocos Sur at Norte na kabilang pa rin sa tinatawag na Solid North o balwarte ni dating Pangulong Ferdinand E. Marcos.

Ang Isabela ay mayroong mahigit 911,000 botante, habang ang Cagayan ay mayroon namang mahigit 647,000 botante.

Ang Ilocos Region naman ay may 3.3 mil­yong botante at kung isasama pa ang Pangasinan na may mahigit 1,900,000 registered voters ay mahigit limang milyong boto ang makokopo ni Poe sa rehiyon.

Nauna nang sinabi ni Poe na kahit nangu­nguna siya sa mga survey ay hindi siya magiging kampante dahil patuloy siyang mag-iikot sa iba’t ibang panig ng bansa hanggang sa Mayo 11, o dalawang araw bago ang halalan.

Grace Poe sa mga supporter: ‘Di ko kayo bibiguin

Tiniyak ni Sen. Grace Poe na hindi niya bibiguin ang mga taong nagtitiwala sa kanya.

Sinabi ito ni Poe matapos manguna sa Pulse Asia survey noong Marso kung saan pito sa bawat 10 Pinoy ang nagsabing iboboto siya ngayong May 13 midterm elections.

Ayon kay Poe, nakakataba ng puso ang ibi­nibigay na suporta ng mamamayan kaya’t na­ngangako siyang hindi sasayangin ang ibinigay na tiwala sa kanya.

“Patuloy tayong magsisikap para ‘wag silang mabigo,” diin ni Poe.

Magpapahinga muna si Poe sa kampanya nga­yong Semana Santa upang lumahok sa Visita Iglesia na siyang naging tradisyon na sa kanyang pamilya.

Pagkatapos na ng Holy Week babalik sa campaign mode si Poe dahil ayaw niyang maging kampante kahit na number 1 siya sa mga naglalabasang survey.

Grace Poe, lagare sa kampanya kahit No. 1

Tuloy ang pukpukang kampanya ni Senadora Grace Poe kahit hindi ito matibag sa number one spot ng mga pre-election survey.

Sinabi ni Poe na marami pa siyang lugar na kailangang suyurin sa nalalabing isang buwan ng kampanya bago ang May 13 midterm elections.

“‘Yung mga gusto kong puntahan sa kampanya na ‘to marami pang lugar, sa Mindanao, sa Visayas at mga liblib na lugar sa Luzon,” ayon sa senadora.

Ani Poe, magpapahinga lamang siya sa panahon ng Semana Santa upang sumama sa tradisyunal na ginagawa ng kanilang pamilya na Visita Iglesia.

“Dito lang sa bahay kasama ng pamilya ko, ‘yung traditional na ginagawa namin, Visita Iglesia; pero hindi ako makakabakasyon hangga’t hindi matapos ang kampanya,” dagdag ni Poe.

Sa March 2019 survey ng Pulse Asia, nama­yagpag si Poe sa number one spot at malaki ang lamang sa pumapangalawang kandidato.

“Ang survey naman paiba-iba ‘yan. So sa tingin ko ang edge na lang natin kung anuman ang nagawa natin sa Senado. At hindi ko ipagkakaila, siyempre si FPJ pa rin. ‘Yung ang naaalala ng mga tao lalo na ang mga nasa probinsiya; very sentimental ang mga tao roon,” paliwanag pa ni Poe.

Sharon todo-suporta kay Poe

Isinapubliko ng sikat na singer, aktres at Megastar Sharon Cuneta ang kanyang pagsuporta kay Senadora Grace Poe na lumalaban para sa reeleksiyon sa nalalapit na May 2019 midterm elections.

Nag-post si Cuneta sa kanyang Instagram ng imahe ni Poe na may caption na nagpapadama ng kanyang matatag na pagsuporta sa senatorial candidate.

“Sen. Grace Poe has my full support and my heart. May God bless you, Senator!” sabi ni Cuneta sa kanyang post.

Sumagot naman agad si Poe sa pag-endorso sa kanya ng sikat na artista at pinasalamatan ang natatanging Megastar.

“Maraming salamat sa pagtitiwala at pagmamahal ng nag-iisang Megastar, Ms. Sharon Cuneta,” sagot ni Poe.

Humingi rin ng pabor si Cuneta at tinanong ang senadora kung may campaign materials ito na balak niyang ipamahagi sa kanyang mga “Sharonians.”

“Sen. Baka you can send me some shirts/campaign materials. I am sure lots of Sharonians would love to have some too,” ani Cuneta.

“Will [send you my address on direct message] or Kiko [Pangilinan] can give to you too. Love you and my Mama Swanie. Hope to see you soon!” dagdag pa ng aktres.

Noong 2016, hindi inendorso ni Cuneta si Poe sa presidential election dahil nahati aniya ang kanyang kalooban sa batang senadora at kay Pangulong Rodrigo Duterte.

Kinokonsidera naman ni Cuneta na kaibigan ang dalawang kandidato.

Grace Poe, nanawagan para sa mga magsasaka

Tuloy ang kampanya ni independent candidate Sen. Grace Poe na bumisita sa mga lungsod ng San Jose at Gapan sa Nueva Ecija nitong Miyerkoles, Abril 3.

Mainit ang naging pagtanggap ng Novo Ecijanos kay Poe na dumalo sa isang forum sa Pag-asa gym sa San Jose bago mag-motorcade sa Gapan.

Sa isang panayam, iginiit ng senadora na dapat ma­bigyan ng ayuda ang mga magsasaka at mangingisda lalo na’t nararanasan ang El Niño sa iba’t ibang parte ng bansa.

Tungkol naman sa napabalitang pagtataboy ng mga mangingisda sa Panatag Shoal, sinabi ni Poe na dapat tulungan ng gobyerno at manaig ang karapatan ng mga Pilipino para makapangisda.

Kabilang ang Nueva Ecija sa top 10 na pinakamaraming botante sa bansa na may 1.46 milyong registered voters.

Samantala, nagtungo rin ang reelectionist senator sa katabing probinsiya ng Tarlac.

Sa bayan ng Victoria, sinuyo ni Poe ang mga residente at ilang lokal na opisyal kung saan ipinaalam niya ang kanyang mga naipasang batas tulad ng libreng feeding program sa mga pampublikong paaralan.

Ayon kay Poe, kapag nabigyan ng pagkakataong mahalal, isusulong niya naman na magkaroon ng universal pension ang senior citizens lalo na sa mga indigent at pagkakaroon ng Philippine Geriatric Center para magkaroon ng pampublikong ospital para sa mga nakatatanda.

Poe, angat na naman sa Pulse Asia survey

Muli na namang ipinakita ng sambayanang Filipino ang mataas nilang paniniwala sa reeleksiyonistang si Senadora Grace Poe para manguna sa pinakahuling Pulse Asia survey.

Sa inilabas na datos nitong Lunes, lumitaw sa isinagawang sarbey ng Pulse Asia noong Pebrero 24 hanggang 28 na kung ngayon na gagawin ang halalan, si Poe ang pinili ng 67.5 percent ng kabuuang 1,800 respondents.

 

Pumangalawa sa kanya ang kapwa reeleksiyonistang si Senadora Cynthia Villar na may 61 percent habang nasa pangatlong puwesto na si dating Special Assistant to the President Christian “Bong” Go na may 53 percent at Senador Sonny Angara na may 52.2 percent para okupahan ang ikaapat na posisyon.

 

Ginamit ng Pulse Asia ang face-to-face interviews sa mga respondent at may ± 2.3 percent error margin mula sa 95 percent confidence level.

 

Ayon sa Pulse Asia, halos dati nang mga mambabatas ang nakabilang sa kanilang talaan ng mga magwawagi sa halalan sa Mayo 13.

Mula sa kabuuang 62 kandidato, sinabi ng Pulse Asia na 14 ang may statistical chance na mapabilang sa 12 mananalo sa eleksiyon.

Kabilang na rin dito sina dating Senador Lito Lapid, 49 percent; Taguig City Representative Pia Cayetano, 47 percent; dating Philippine National Police chief Ronald dela Rosa, 44.6 percent; Senador Nancy Binay, 40.5 percent at dating Senador Mar Roxas, 39.8 percent.

Para mabuo ang sinasabing 14 na senador, kasama rito sina dating Senador Ramon Bong Revilla, Jr., 36.8 percent; Ilocos Norte Governor Imee Marcos, 36 percent; Senador Aquilino Pimentel III, 35.6 percent; dating Senador Jinggoy Estrada, 33.9 percent at dating Presidential Adviser on Political Affairs Francis Tolentino, 32.1 percent.

Ipinakita rin ng sarbey na 37 percent ng mga botante ang mayroon ng 12 senatorial candidates na naglalaro sa kanilang isipan dalawang buwan pa man bago maganap ang eleksiyon.

Idinagdag pa ng Pulse Asia na 1 percent ng mga respondent ang hindi nagpamalas ng pagsuporta sa sinumang kandidato para Senador.

Poe sa Vigan

Patuloy ang pagbisita ng releksiyonistang si Senadora Grace Poe sa tinaguriang Solid North na nagpamalas naman ng malakas na pagsuporta sa kanya.

Habang naglalakad sa tanyag na Calle Crisologo sa Vigan, Ilocos Sur, sinalubong siya nang mainit na pagtanggap mula sa mga estudyante at lokal na turista.

Para kay Poe, nagagalak siya na sa gitna ng walang tigil na pag-unlad ng Vigan, hindi pa rin kinakalimutan ng mamamayan nito ang kanilang mayamang kasaysayan.

Pinanatili ng Vigan ang kanilang matapat na pagmamahal sa bayan sa pamamagitan ng pangangalaga sa orihinal na porma ng Calle Crisologo.

“Inspirasyon kayo iti panag-asenso nga haan yo liplipatan iti history yo. Sapay koma ta matulad tayo datoy nga aramidyo para ti buo ng Pilipinas,” sabi ni Poe.

Labis din ang kanyang pasasalamat sa mga Ilocano na tumanggap sa kanya nang mainit sa kanilang lalawigan.

“Higit sa empanada, bagnet at longganisa, nabsugak iti kinabara na iti panang-welcome ken arakop yo kanyak dito’y.”

Nagtungo rin si Poe sa University of Northern Philippines sa Vigan para bisitahin at makausap ang mga estudyante.

Naunang pinasyalan ni Poe ang Pangasinan para simulan ang provincial leg ng kanyang campaign sortie.