Grace Poe, lagare sa kampanya kahit No. 1

Tuloy ang pukpukang kampanya ni Senadora Grace Poe kahit hindi ito matibag sa number one spot ng mga pre-election survey.

Sinabi ni Poe na marami pa siyang lugar na kailangang suyurin sa nalalabing isang buwan ng kampanya bago ang May 13 midterm elections.

“‘Yung mga gusto kong puntahan sa kampanya na ‘to marami pang lugar, sa Mindanao, sa Visayas at mga liblib na lugar sa Luzon,” ayon sa senadora.

Ani Poe, magpapahinga lamang siya sa panahon ng Semana Santa upang sumama sa tradisyunal na ginagawa ng kanilang pamilya na Visita Iglesia.

“Dito lang sa bahay kasama ng pamilya ko, ‘yung traditional na ginagawa namin, Visita Iglesia; pero hindi ako makakabakasyon hangga’t hindi matapos ang kampanya,” dagdag ni Poe.

Sa March 2019 survey ng Pulse Asia, nama­yagpag si Poe sa number one spot at malaki ang lamang sa pumapangalawang kandidato.

“Ang survey naman paiba-iba ‘yan. So sa tingin ko ang edge na lang natin kung anuman ang nagawa natin sa Senado. At hindi ko ipagkakaila, siyempre si FPJ pa rin. ‘Yung ang naaalala ng mga tao lalo na ang mga nasa probinsiya; very sentimental ang mga tao roon,” paliwanag pa ni Poe.

Kabayanihan ng karaniwang Pinoy, pinuri ni Grace Poe

Pinuri ni Sen. Grace Poe ang pang-araw-araw na kabayanihan ng lahat ng Pilipino kaugnay ng pagdiriwang ng “Araw ng Kagitingan” kahapon sa pangangampanya sa lalawigan ng Rizal.

Kasama ang kanyang anak na si Brian Poe Llamanzares, reelectionist Cainta Mayor Kit Nieto at running mate nitong si Ace Sevillon, pumarada sila Poe sa bayan na tumanyag sa paglaban sa okupasyon ng mga dayuhan.

“Sa ating mga kababayan na nagsasakripisyo, hindi lang para sa pamilya kundi para sa bayan—iyong mga nagsisilbi, iyong ating sundalo, pulisya, OFWs, mga empleyado na araw-araw nagsisikap—ito ay para sa inyo, at ako naman po bilang tagapaglingkod ninyo nais ko talagang bigyan ng pagkilala ang inyong sakripisyo,” sabi ni Poe sa panayam ng mga reporter matapos ang motorcade sa paligid ng Cainta.

Sa Marick Subdivision, nilapitan ni Poe ang isang grupo ng lalaki at babae na naka-wheelchair at nagpakuha ng litrato.

Nangampanya na si Poe sa iba’t ibang bahagi ng Luzon, Visayas at Mindanao pero iginiit ng senadora na gustong-gusto niyang nakakausap ang mga tao para mabatid ang kanilang karaingan at opinyon sa pamumuhay.

 “Masaya na nakakapagod pero talagang kailangan kayod talaga kasi siyempre napakalaki ng Pilipinas para abutin mo lahat ‘yan at maraming kandidato na lahat nagsisipag,” sabi ni Poe sabay pag-amin na malaki ang nagawa ng kanyang amang si Fernando Poe Jr. sa magaang na pangangampanya.

“Sa tingin ko, iyong edge na lang natin ay kung anuman ang nagawa natin sa Senado. Hindi ko ipagkakaila, siyempre si FPJ pa rin, iyon ang naaalala ng mga tao, lalo na sa probinsiya, very sentimental ang mga tao doon,” ani Poe na tatangkaing malibot ang mas maraming lugar sa mga susunod na linggo.  “Syempre nakikita ka sa TV, pero iba pa rin iyong nakikita ka nang personal.”

Sharon todo-suporta kay Poe

Isinapubliko ng sikat na singer, aktres at Megastar Sharon Cuneta ang kanyang pagsuporta kay Senadora Grace Poe na lumalaban para sa reeleksiyon sa nalalapit na May 2019 midterm elections.

Nag-post si Cuneta sa kanyang Instagram ng imahe ni Poe na may caption na nagpapadama ng kanyang matatag na pagsuporta sa senatorial candidate.

“Sen. Grace Poe has my full support and my heart. May God bless you, Senator!” sabi ni Cuneta sa kanyang post.

Sumagot naman agad si Poe sa pag-endorso sa kanya ng sikat na artista at pinasalamatan ang natatanging Megastar.

“Maraming salamat sa pagtitiwala at pagmamahal ng nag-iisang Megastar, Ms. Sharon Cuneta,” sagot ni Poe.

Humingi rin ng pabor si Cuneta at tinanong ang senadora kung may campaign materials ito na balak niyang ipamahagi sa kanyang mga “Sharonians.”

“Sen. Baka you can send me some shirts/campaign materials. I am sure lots of Sharonians would love to have some too,” ani Cuneta.

“Will [send you my address on direct message] or Kiko [Pangilinan] can give to you too. Love you and my Mama Swanie. Hope to see you soon!” dagdag pa ng aktres.

Noong 2016, hindi inendorso ni Cuneta si Poe sa presidential election dahil nahati aniya ang kanyang kalooban sa batang senadora at kay Pangulong Rodrigo Duterte.

Kinokonsidera naman ni Cuneta na kaibigan ang dalawang kandidato.

Grace Poe, nanawagan para sa mga magsasaka

Tuloy ang kampanya ni independent candidate Sen. Grace Poe na bumisita sa mga lungsod ng San Jose at Gapan sa Nueva Ecija nitong Miyerkoles, Abril 3.

Mainit ang naging pagtanggap ng Novo Ecijanos kay Poe na dumalo sa isang forum sa Pag-asa gym sa San Jose bago mag-motorcade sa Gapan.

Sa isang panayam, iginiit ng senadora na dapat ma­bigyan ng ayuda ang mga magsasaka at mangingisda lalo na’t nararanasan ang El Niño sa iba’t ibang parte ng bansa.

Tungkol naman sa napabalitang pagtataboy ng mga mangingisda sa Panatag Shoal, sinabi ni Poe na dapat tulungan ng gobyerno at manaig ang karapatan ng mga Pilipino para makapangisda.

Kabilang ang Nueva Ecija sa top 10 na pinakamaraming botante sa bansa na may 1.46 milyong registered voters.

Samantala, nagtungo rin ang reelectionist senator sa katabing probinsiya ng Tarlac.

Sa bayan ng Victoria, sinuyo ni Poe ang mga residente at ilang lokal na opisyal kung saan ipinaalam niya ang kanyang mga naipasang batas tulad ng libreng feeding program sa mga pampublikong paaralan.

Ayon kay Poe, kapag nabigyan ng pagkakataong mahalal, isusulong niya naman na magkaroon ng universal pension ang senior citizens lalo na sa mga indigent at pagkakaroon ng Philippine Geriatric Center para magkaroon ng pampublikong ospital para sa mga nakatatanda.

Pinapatay sa gutom ang mga residente ng Pag-asa Island

Luminaw ang kawalang pag-asa ng mga naninirahan sa Pag-asa Island na bahagi ng munisipalidad ng Kalayaan sa lalawigan ng Palawan nang sa wakas ay magprotesta ang Pilipinas sa pambu-bully ng China.

Hindi pa malinaw kung ano klaseng diplomatic protest ang isinampa ni Department of Foreign Affairs Secretray Teodoro Locsin Jr. pero para kay Chinese Ambassador Zhao Jinhua, isang uri lamang ito ng atake sa liderato ng China tulad ng pagsasampa ng kaso sa International Criminal Court (ICC) ng dalawang dating opisyal ng Pilipinas kay Chinese President Xi Jinping.

Naalarma na ang gobyerno nang mabatid na pinalilibutan ng mahigit 200 barkong Chinese ang Pag-asa Island na mas kilalang Thitu Island sa mga bansang China, Vietnam at Taiwan.

Marahil, naniniwala na ngayon si Presidential Spokesperson Salvador Panelo na hindi makapangisda ang mga residente ng Pag-asa dahil “kinukuyog” ng mga barkong pandigma at pangisda ng China.

Gusto ng mga Chinese na mamatay sa gutom ang taga-Pag-asa para umalis at nang sa gayon ay makubkob nila ang ikalawang pinakamalaking isla sa Spartlys.

Kataka-taka naman ang sobrang pagtatanggol ni Panelo na eksaherado raw ang ulat ng Western Command ng Armed Forces of the Philippines na nakapagtala ng 600 barko umiikot sa Pag-asa mula noong Enero.

Panahon na para gamitin ng Pilipinas ang desisyon ng The Hague sa reklamo nito laban sa nine-dash line ng China. Nagwagi ang ating bansa at tama na ang pambu-bully ng mga Chinese laban sa mga mangingisdang Pilipino na nais lamang mabuhay.

Narco celebrities, gustong ibulgar ng PNP

Kung si Philippine National Police (PNP) Chief Gen. Oscar Albayalde ang tatanungin, mas nanaisin niyang ilabas ang pangalan ng mga artistang nauugnay sa ilegal na droga at napabilang sa drug watchlist.

Sa panayam kay Albayalde, dapat lang aniya na matukoy kung sino sa mga celebrity na nasasangkot sa illegal drug trades kagaya nang nais ng PNP chief noong ilabas ang talaan ng narco politicians.

Iginiit ni Albayalde na nasa desisyon ito ngayon ng Philippine Drug Enforcement Agency (PDEA), Department of the Interior and Local Government (DILG) at ng Office of the President.

Naunang ipinabatid ni PDEA director general Aaron Aquino na kasama sa 31 celebrities gayundin ang 11 aktres ang nasa drug watchlist.

Hindi naman sumasang-ayon si Aquino na ilantad ang mga pangalan ng artista dahil nais nilang matiyak kung gaano katotoo ang impormasyon.

Idinagdag naman ni Albayalde na iniipon pa nila ang mga ebidensiya laban sa mga nasabing artista bago sampahan ng kaso.

Noon pa mang nakapuwesto siya bilang National Capital Region Police Office director, sinabi ni Albayalde na mayroon nang 50 artista ang nasa kanilang watchlist.

Nagbabala rin ang Malacañang sa mga artistang nasa druglist na itigil na nila ang kanilang mga ilegal na aktibidad bago sila hulihin.

Hinimok naman ni Senate President Vicente Sotto III ang PDEA na isapubliko na ang nasabing celebrity watchlist.

“I’m in favor of releasing the list, but it should be validated. Take note that the term ‘celebrities’ refers to not only showbiz people but also basketball players and other public figures,” sabi ni Sotto.

Ressa dinampot sa NAIA

Muling inaresto si Rappler chief executive Maria Ressa ilang sandali matapos dumating sa Ninoy Aquino International Airport (Naia) nitong Biyernes ng umaga.

Inisyu ang arrest warrant ni Judge Acerey Pacheco ng Pasig Regional Trial Court Branch 265, kagaya ng mapapanood sa Facebook livestream ng balita sa Rappler website.

“Landing in a short while to face my latest arrest warrant and the 7th time I will post bail,” sabi ni Ressa sa kanyang Twitter.

“Will they actually arrest me again?! @rapplerdotcom this is insane. Such violations of the Bill of Rights and the PH Constitution,” dagdag pa ng dating CNN correspondent.

Kinasuhan sina Ressa kasama ang iba pang Rappler executives na sina Manuel Ayala, Nico Jose Nolledo, Glenda Gloria, James Bitangca, Felicia Atienza at James Velasquez ng Pasig City prosecutors sa mga hinihinalang paglabag sa Anti-Dummy Law at Securities Regulations Code (SRC).

Binawi ng Securities and Exchange Commission (SEC) ang license to operate ng Rappler dahil sa paglabag sa constitutional cap on foreign ownership.

Naaresto si Ressa noong nakaraang buwan dahil sa cyberlibel case at nagpalipas ng magdamag sa tanggapan ng National Bureau of Investigation.

Nagpiyansa naman si Ressa ng P100,000 sa Manila Regional Trial Court Branch 46 para sa nasabing cyberlibel case.

Poe, Numero Uno sa Veritas Truth Survey

Pinatunayan ni Senadora Grace Poe ang kanyang katapatan sa paglilingkod sa bayan kaya naman siya ang nanguna sa isinagawang Veritas Truth Survey mula Pebrero hanggang Marso para sa darating na halalan sa Mayo 13.

Ayon sa survey na kinapanayam ang mga botanteng Katoliko mula sa iba’t ibang parokya sa buong bansa, nakamit ni Poe ang number one slot para pangunahan ang lahat ng mga kandidato sa pagka-Senador sa nalalapit na midterm elections.

 

“Nagpapasalamat tayo sa ating mga kababayan na number one tayo sa trust rating ng mga tumatakbo sa Senado. Ang inyong pagtitiwala ay sinusuklian natin ng tapat at mahusay na paglilingkod,” pahayag ni Poe habang bumisita nitong Miyerkules sa Cotabato para sa ika-5 anibersaryo ng Comprehensive Agreement on the BangsaMoro.

 

“Tinitiyak natin sa ating mga kababayan dito ang ating suporta sa mga polisiya at programang magsusulong ng pangmatagalang kapayapaan at kaayusan sa Mindanao,” dagdag pa ng batang Senadora.

 

Sinundan si Poe ng mga kapwa reeleksiyonistang sina Senador Sonny Angara at Cynthia Villar para okupahan ang pangalawa at pangatlong puwesto. Habang nasa ikaapat na posisyon ang nagbabalik sa Senador na si Pia Cayetano, pumanglima naman ang doktor na si Willie Ong.

 

Para kumpletohin ang magic 12 senatorial slate, kabilang sina dating PNP chief Ronald “Bato” Dela Rosa (6th), Senadora Nancy Binay (7th), Senador Paulo “Bam” Aquino (8th), dating Special Assistant to the President Christopher “Bong” Go (9th), dating Bayan Muna Rep. Neri Colmenares (10th), dating Senate President Aquilino “Koko” Pimentle III at Francis Tolentino (12th).

 

Ginamit ng Veritas Truth Survey ang mga datos mula sa 1,200 stratified respondents mula sa 86 na Arkidiyosesis at Diyosesis ng Simbahang Katolika sa buong kapuluan na may +/-3% margin of error.

Pinakamalaking transport group, sumuporta kay Poe

Sinuportahan ng pinakamalaking transport group na Pinagkaisang Samahan ng mga Tsuper at Opereytor Nationwide (PISTON) ang kandidatura ni Senadora Grace Poe para sa nalalapit na halalan sa Mayo 13.

“Batay   sa resolusyon na pinagtibay ng ika-6 na pambansang kongreso ng PISTON,  mahalagang suportahan, ikampanya at iboto ng mga drivers at maliliit na operators na maibalik sa Senado si Senadora Grace Poe,” ayon sa Facebook account ng pangulo ng PISTON na si George San Mateo.

“Si Sen. Grace Poe na  kasangga ng mga drivers at maliliit na operators sa pakikibaka laban sa jeepney phase out at pekeng negosyong PUV (public utility vehicle) modernization ni Duterte. Si Sen. Poe ay matagal nang kapanalig ng  Makabayan Coalition,” dagdag ni San Mateo.
Matatandaang si Poe bilang Senate chairperson ng committee on public services ang kumontra sa utos ng Quezon City Regional Trial Court na arestuhin si San Mateo sa reklamo ng Land Transportation Franchising and Regulatory Board sa pangunguna sa welgang bayan ng Piston noong Pebrero 27, 2017.

“Everyone has the right to peaceably assemble. It is unclear based on the cited section of the Public Service Act what exactly San Mateo violated,” sabi ni Poe noon. “If holding a strike is tantamount to a violation under any memorandum of the LTFRB, then the proper penalty should have been a fine or suspension or cancellation of their franchise, not threatening their leader with incarceration.”

Laos nang si Misuari, bakit pinakikinggan ni Duterte?

Iginigiit sa gobyerno ni dating­ Moro National Liberation Front (MNLF) chairman Nur Mi­suari ang Federalismo kapalit ng pangmatagalang kapayapaan sa Mindanao.

Ito ang inihayag ni Pangulong­ Rodrigo Duterte sa muling pakiki­pagkita ni Misuari sa kanya nitong Martes ng gabi sa Malacañang matapos dumating mula sa dina­luhang conference sa Gitnang Silangan.


Sinabi ng Pangulo na sinisingil na ni Misuari ang Federalismong ipinangako noon dito ni dating Pangulong Corazon Aquino.

Ayin sa Pangulo, kaya niya isinapubliko ang naging usapan nila ni Misuari para marinig ng mga mambabatas at kumilos at magpasya kung ano ang inaakalang tama para sa bansa.

“Kagabi nag-usap kami sa harapan nina Gen. (Carlito) Galvez sa OPAPP, Gen. (Hermogenes) Esperon at apat pang heneral. Sabi ni Misuari ito ang gusto ko Federalismo,” anang Pangulo.

Ayon pa sa Presidente, tinapat siya ni Misuari na kapag hindi ibi­nigay ang Federalismo ay magkakaroon ng giyera sa Mindanao.

“Sabi ni Misuari kagabi, if you do not give it to me, let me be very honest, I will go to war,” dagdag ng Pangulo.

Lumalabas na bina-blackmail ni Misuari si Duterte sa iginigiit nitong Federalismo at payag na payag naman ang Pangulo kaya nakikiusap siya sa Kongreso na kaagad ipasa ang Charter Change o Cha-Cha.

Ngunit sino pa ba ang nakikinig kay Misuari kundi si Duterte lamang Kung gusto niya ng giyera, bakit hindi niya simulan tulad ng panggugulo ng mga tauhan niya sa Zamboanga City noong.2013.

Ang dapat kay Duterte, papanagutin si Misuari sa mga kasalanan nito hindi iyong kinukunsinte niya ang “laos” nang lider ng MNLF na hindi na pinakikinggan ng mga dating kasamahan nito.