Pinakamalaking transport group, sumuporta kay Poe

Sinuportahan ng pinakamalaking transport group na Pinagkaisang Samahan ng mga Tsuper at Opereytor Nationwide (PISTON) ang kandidatura ni Senadora Grace Poe para sa nalalapit na halalan sa Mayo 13.

“Batay   sa resolusyon na pinagtibay ng ika-6 na pambansang kongreso ng PISTON,  mahalagang suportahan, ikampanya at iboto ng mga drivers at maliliit na operators na maibalik sa Senado si Senadora Grace Poe,” ayon sa Facebook account ng pangulo ng PISTON na si George San Mateo.

“Si Sen. Grace Poe na  kasangga ng mga drivers at maliliit na operators sa pakikibaka laban sa jeepney phase out at pekeng negosyong PUV (public utility vehicle) modernization ni Duterte. Si Sen. Poe ay matagal nang kapanalig ng  Makabayan Coalition,” dagdag ni San Mateo.
Matatandaang si Poe bilang Senate chairperson ng committee on public services ang kumontra sa utos ng Quezon City Regional Trial Court na arestuhin si San Mateo sa reklamo ng Land Transportation Franchising and Regulatory Board sa pangunguna sa welgang bayan ng Piston noong Pebrero 27, 2017.

“Everyone has the right to peaceably assemble. It is unclear based on the cited section of the Public Service Act what exactly San Mateo violated,” sabi ni Poe noon. “If holding a strike is tantamount to a violation under any memorandum of the LTFRB, then the proper penalty should have been a fine or suspension or cancellation of their franchise, not threatening their leader with incarceration.”

Laos nang si Misuari, bakit pinakikinggan ni Duterte?

Iginigiit sa gobyerno ni dating­ Moro National Liberation Front (MNLF) chairman Nur Mi­suari ang Federalismo kapalit ng pangmatagalang kapayapaan sa Mindanao.

Ito ang inihayag ni Pangulong­ Rodrigo Duterte sa muling pakiki­pagkita ni Misuari sa kanya nitong Martes ng gabi sa Malacañang matapos dumating mula sa dina­luhang conference sa Gitnang Silangan.


Sinabi ng Pangulo na sinisingil na ni Misuari ang Federalismong ipinangako noon dito ni dating Pangulong Corazon Aquino.

Ayin sa Pangulo, kaya niya isinapubliko ang naging usapan nila ni Misuari para marinig ng mga mambabatas at kumilos at magpasya kung ano ang inaakalang tama para sa bansa.

“Kagabi nag-usap kami sa harapan nina Gen. (Carlito) Galvez sa OPAPP, Gen. (Hermogenes) Esperon at apat pang heneral. Sabi ni Misuari ito ang gusto ko Federalismo,” anang Pangulo.

Ayon pa sa Presidente, tinapat siya ni Misuari na kapag hindi ibi­nigay ang Federalismo ay magkakaroon ng giyera sa Mindanao.

“Sabi ni Misuari kagabi, if you do not give it to me, let me be very honest, I will go to war,” dagdag ng Pangulo.

Lumalabas na bina-blackmail ni Misuari si Duterte sa iginigiit nitong Federalismo at payag na payag naman ang Pangulo kaya nakikiusap siya sa Kongreso na kaagad ipasa ang Charter Change o Cha-Cha.

Ngunit sino pa ba ang nakikinig kay Misuari kundi si Duterte lamang Kung gusto niya ng giyera, bakit hindi niya simulan tulad ng panggugulo ng mga tauhan niya sa Zamboanga City noong.2013.

Ang dapat kay Duterte, papanagutin si Misuari sa mga kasalanan nito hindi iyong kinukunsinte niya ang “laos” nang lider ng MNLF na hindi na pinakikinggan ng mga dating kasamahan nito.

Inutil na MWSS, sinabon ni Poe

Tama lamang na ibagsak ang sisi ni Senadora Grace Poe sa Metropolitan Waterworks and Sewerage System (MWSS) ang malaking kakulangan sa bisyon nito na mapaghandaan ang dinadanas na krisis sa tubig sa ilang bahagi ng Kamaynilaan may ilang linggo na ang nakalilipas.

Sa isinagawang hearing ng Senate committee on public services, binira ni Poe ang kainutilan ng MWSS kung bakit ngayon nagdurusa ang milyon-milyong residenteng naapektuhan ng kakulangan ng tubig na isinusuplay ng Manila Water.

 

“Sa tingin ko hindi na nila ginagawa ang trabaho nila. Ang nakakalungkot dito, malaki ang pagkukulang ng Manila Water pero sa tingin ko mas malaki ang pagkukulang ng MWSS,” sabi ni Poe na chair ng nasabing komite.

 

Iginiit pa ng reeleksiyonistang Senadora na ipinabatid nang Manila Water noon pang nakaraang taon ang nakikita nilang kakulangan ng suplay ng tubig sa MWSS subalit binalewala ito ng mga opisyales.

 

Hindi man lang aniya nakipagkoordinasyon ang MWSS sa Manila Water kung operasyonal na ang Cardona plant ng water concessionaire dahil masosolusyonan sana nito ang dinadanas na problema sa tubig ng kompanya sa kasalukuyan.

Ipinabatid naman ni Senador Joel Villanueva na binubuo ang MWSS Board of Trustees ng anim na abogado, dalawang retiradong opisyal ng militar at isang chemical engineer.

 

Sinabi ni Villanueva na walang civil engineer, na nakaalam sa impraestruktura ng sistema ng suplay ng tubig, ang MWSS na posibleng isang dahilan kung bakit nagkaproblema ngayon ang bansa.

 

“Ang MWSS [board] dapat mayroon silang inhinyero, civil engineer. Puro abogado sila doon, eh. Hindi talaga nila nakita ang problemang ito dahil hindi nila maintindihan,” paliwanag naman ni Poe.

 

Naniniwala rin si Poe na dapat nang magreorganisa ang MWSS dahil napakaraming abogado sa kanilang Board.

Napilitang putulin ng Manila Water ang suplay ng tubig sa ilang bahagi ng Metro Manila sanhi ng dinadanas nitong lumiliit na suplay sa harap naman ng tumataas na pangangailangan ng mga konsumer. Dagdag na rin ang pagkaantala ng mga proyektong pang-impraestruktura at bumababang suplay ng tubig sa La Mesa Dam.

 

Groundbreaking ng bagong Senate building sa Taguig, pinangunahan ni Sotto

Pinangunahan ni Senate President Vicente “Tito” Sotto III ang ground-breaking ceremony ng bagong gusali ng Senado sa Taguig City nitong Lunes.

Itatayo ang proyektong nagkakahalaga ng P8.9 bilyon sa Navy Village, Fort Bonifacio sa Taguig City.

Bukod kay Sotto, naroon din sa ground-breaking ceremony sina Senate President Pro Tempore Ralph Recto; Majority Leader Juan Miguel Zubiri; Minority Leader Franklin Drilon; mga senador na sina Panfilo Lacson, Loren Legarda, Gringo Honasan, Nancy Binay, Joel Villanueva at Sherwin Gatchalian.

Naunang sinabi ni Lacson na aabutin ng 40 buwan kung sisimulan ngayong taon hanggang 2022 ang bagong tahanan ng Senado.

“I do realize, Mr. President, that I promised that we will have the opening of the 18th Congress by 2021 at this new facility. I want to assure you that this target is still within reach as we carry out ways to fast-track the project and design it to be completed in strategic phases which I will detail afterwards,” pahayag ni Lacson sa kanyang ulat sa Senado noong nakaraang buwan.

Si Lacson ang chair ng Senate committee on accounts na gumawa ng pag-aaral para sa gagawing bagong gusali ng Senate building.

Pagpapahalaga sa kabuhayan ng mga promdi, isusulong ni Grace Poe

Nangako si Senadora Grace Poe na magtutulak siya ng mas maraming batas na magpapabuti sa kapakanan at kabuhayan ng mga Pilipinong naninirahan sa mga probinsiya.

Ito ang binitawang pahayag ni Poe sa pagbisita nito sa lalawigan ng Batangas kasama ang suporta nina Senate President Pro Tempore Ralph Recto, asawa ng kongresistang si Vilma Santos-Recto at Gobernador Hermilando Mandanas.

“Sa pagtutulungan ng lokal na pamahalaan at ng lehislatura, magsusulong tayo ng mga batas, polisiya at programang magpapayaman sa buhay ng mga Batangueño at iba pang kababayan natin sa mga lalawigan,” sabi ni Poe.

Nagpahayag naman ng malaking suporta si Ate Vi kay Poe na nagmula rin sa industriya ng entertainment tulad ng ama nitong si Fernando Poe Jr. o FPJ.

“Malaki ang iniangat ng kalidad ni Sen. Poe bilang lider mula nang magbalik sa bansa para ilaban ang kanyang ama na naging biktima ng Dagdag-Bawas sa halalang pampanguluhan noong 2004,” ani Ate Vi. “Ang pagpapakita niya ng malasakit sa mga kabataan at bata ay tunay at totoong ipaglalaban niya ang mga probinsiya para umangat ang buhay.”

Mula sa Batangas, nagtungo si Poe sa Calapan, Oriental Mindoro para dumalo sa inagurasyon ng Barangay Pachoca Multi-Purpose Building.

Pinadaling proseso ng pag-aampon, aprubado sa Palasyo

Nilagdaan ni Pangulong Rodrigo Duterte upang magsilbing ganap na batas ang panukalang magpapadali sa proseso ng pag-aampon sa bansa.

Pinirmahan ng Punong Ehekutibo ang Simulated Birth Rectification Act noon pang Pebrero 21 ngunit nito lamang Huwebes naipamahagi ang kopya ng batas sa mga mamamahayag.

Nakasaad sa batas na tinutukoy ang birth simulation bilang pagkilos ng civil registry upang mapalabas sa record na isinilang ang bata sa isang tao na hindi niya biological mother.

Sa ilalim ng bagong batas na ito, pagkakalooban ng amnestiya at pahihintulutan ang rektipikasyon ng simulated birth ng isang bata kung saan ginawa ang simulation para sa pinakamabuting interes ng bata.

Nakapaloob din dito na “person or persons who, prior to the effectivity of this Act, simulated the birth of a child, and those who cooperated in the execution of such simulation, shall not be criminally liable for such act provided that the simulation of birth was made for the best interest of the child and that the child has been consistently considered and treated by such person or persons his, her, or their own daughter or son.”

Nakalagay din sa batas na ang sinumang tao o mga tao na gumawa ng simulation para sa kapanganakan ng isang bata “may avail of administrative proceedings for the adoption and rectification of the simulated birth record of a child provided that the child has been living with the person for at least three years before the effectivity of the law.”

Batay sa Section 6 ng bagong batas, “all petitions, documents, records, and papers relating to adoption and rectification of simulated births” ay hindi maaaring gamitin bilang “evidence against those who simulated the birth of a child or who cooperated in the execution of such simulation in any criminal, civil, or administrative proceeding.”

Kasama sa mga requirement para sa administrative adoption na dapat isang Filipino citizen na nasa tamang edad, na may kompletong karapatang sibil at legal, may mabuting karakter at asal, hindi nahatulan ng anumang krimen, may kakayahang emosyonal at saykolohikal para mangalaga sa isang bata at nasa posisyon upang masuportahan at mapangalagaan ang bata sa isang tunay na pamilya.

“In case of adoption by a married couple, where one of the adopters is a foreign national married to a Filipino, the law stated that the foreign national must have been residing in the Philippines for at least three continuous years prior to the filing of the petition for adoption and application for rectification of simulated birth record,” dagdag pa ng batas.

Kinakailangan din ang sertipikong magdedeklarang legal na maaaring ampunin ang isang bata mula sa Department of Social Welfare and Development (DSWD).

Sa sandaling nakumpleto na ang mga requirement, isusumite naman ang petisyon sa social welfare and development office ng lungsod o munisipalidad.

Rerebisahin ito ng regional director at saka dadalhin sa tanggapan ng Kalihim ng DSWD.

“The adoptee shall be considered the legitimate daughter or son of the adopter for all intents and purposes and as such is entitled to all the rights and obligations provided by law to legitimate daughters or sons born to them without discrimination of any kind,” ayon pa rin sa batas.

2 US investors, interesado sa Hanjin

Interesado ang dalawang malaking kompanyang Amerikano na isalba ang bangkaroteng Hanjin Heavy Industries and Construction Philippines (HHIC-Phil), na subsidiary ng isang Korean shipbuilder.

Ipinabatid ng court-appointed Hanjin receiver na si Atty. Rosario Bernaldo ang balita para matulungan ang problemadong shipbuilder ngunit hindi pa binanggit kung sino ang dalawang interesadong partido.

Gayunman sinabi ni Bernaldo na malaki ang grupo ng Amerikano na nais magpondo sa Hanjin. Nakikipag-usap na aniya ang grupo sa RCBC Group na may pinakamalaking pautang sa kompanya na umaabot sa $140 milyon mula sa kabuuang $412 milyong utang sa limang bangko sa Pilipinas.

Nasa $80 milyon ang pautang ng Land Bank of the Philippines sa Hanjin samantalang may $72 milyon at $60 milyon namang pautang ang Metropolitan Bank and Trust Co. at BDO Unibank, ayon sa pagkakasunod. Nagpautang din ang Bank of the Philippine Islands ng $52 milyon sa nasabing kompanya na nagdeklarang bangkarote sa unang bahagi ng Enero.

Idinagdag pa ni Bernaldo na isang American group ang bumubuo ng consortium sa Singaporean at Italian shipbuilder.

Bilang overseer ng HHCI-Phil, ipinaliwanag ni Bernaldo na ang joint venture sa lokal na shipbuilder at  bagong mamumuhunan ang may pinakamalaking tyansang maibalik ang operasyon ng problemadog South Korean shipbuilder.

“I want the workers to have employment again,” ani Bernaldo.

Bukod sa dalawang US group, interesado rin ang Dutch shipbuilder na Damen Shipyard Group na nagsagawa ng technical inspection sa Hanjin shipyard sa Subic Freeport at nakipag-usap na rin sa Department of Trade and Industry at Board of Investments (BOI).

Alternative media, humingi ng ayuda sa DICT

Nanawagan ang mga mamamahayag mula sa alternatibong news organizations sa Department of Information and Communications Technology (DICT) na kumilos laban sa Distributed Denial of Service attacks sa kanilang mga website.

“We have reason to believe that the Duterte administration has orchestrated this cyber attack on websites of critical and independent media as part of its efforts to silence criticism and dissent against it,” pahayag ni Ronalyn Olea, Managing Editor ng Bulatlat.

Ginawa ni Olea ang pahayag kaugnay sa pagdiriwang ng World Day Against Cyber-Censorship at iginiit pang kabilang na rin ang cyber attacks sa mga alternatibong media sa pangkalahatang pag-atake sa press freedom sa bansa kagaya ng ginawa sa Rappler at ABS-CBN.

Ipinaliwanag ng Palasyo na hindi pag-atake sa press freedom ang isyu laban sa Rappler samantalang sinabi naman ng Presidential Communications Operations Office (PCOO) na buhat at maayos pa rin ang press freedom sa Pilipinas.

“Not content with fomenting disinformation and fake news, the Duterte administration is hell-bent on silencing what it considers as fierce critics and political opponents and goes to extreme lengths and harnessing even the power of the dark web,” sabi naman ni Jola Diones-Mamangun, Executive Director ng Kodao Productions.

Hindi naman sila nagbigay ng detalye kung bakit pinaghihinalaan nila ang pamahalaan sa pag-atake ng kanilang mga website.

Gayunman, sinabi nila na inatake na ng mga DDoS ang Bulatlat, Kodao Productions, Pinoy Weekly at Altermidya simula pa noong Disyembre 2018.

Ayon sa Electronic Frontier Foundation, layunin ng DDoS na pansamantalang hindi gumana ang kanilang mga online resources sa pamamagitan ng pagpuno ng mga ito ng sobrang traffic sa internet kaya hindi magamit ng mga regular nilang user.

“This is why we are here. We demand that they act on the attacks. Otherwise, we will be led to believe that NCERT and DICT are complicit in the attack on press freedom,” wika ni Rhea Padilla, Altermidya national coordinator.

Dumanas din ng labis na pag-atake ang mga website ng National Union of Journalists of the Philippines, Philippine Center for Investigative Journalism at ang Vera Files sa loob ng mga nakalipas na taon.

Sapin-saping kaso, isasampa laban kay Balutan

Matapos sibakin ni Pangulong Rodrigo Duterte, malaki pa ang problema ni dating Philippine Charity Sweepstakes Office (PCSO) General Manager Alexander Balutan dahil maaari itong sampahan ng sapin-saping kaso ng korupsiyon ng Malakanyang.

Sinabi ni Presidential Spokesman Salvador Panelo na kapag may nakitang mga ebidensiya ay hindi puwedeng hindi makasuhan ang dating opisyal.

Ayon kay Panelo, kabilang sa mga paratang kay Balutan ang illegal solicitation, pagpapa-subcontract ng mga prangkisa at patuloy na operasyon ng small town lottery na naginging prente ng jueteng.

Idiniin ni Panelo na ang pagsibak kay Balutan ay babala sa lahat ng opisyal na pamahalaan na walang “sacred cow” sa administrasyong Duterte.

Binanggit naman ni Sen. Panfilo ‘Ping’ Lacson na dahil inanunsiyo ng Palasyo ang dahilan ng pagsibak kay Balutan, natural lamang na sundan ito ng kaukulang kaso.

“Since Malacañang has ­already cited and announce the reason for his sacking, it is incumbent upon them to file the necessary criminal charges for violation of the country’s anti-graft law,” diin ng senador.

Nagtataka naman ang senador kung bakit nasangkot sa katiwalian si Balutan dahil mataas ang pagtingin niya rito, lalo na noong tumestigo laban sa noon ay Pangulong Gloria Macapagal-Arroyo hinggil sa dayaan noong 2004 presidential elections.

“But when we conducted Senate hearings on the possible corruption in the PCSO under Balutan’s watch in relation to STL (small-town lottery) operations, I kept asking myself-what has happened to this man? If only his demeanor and other data gathered by our committees in those hearings, I am inclined to think there is basis in his sacking as PCSO Gen. Manager,” diin ni Lacson.

MAY “FPJ MAGIC” PA RIN SA SWS SURVEY Grace Poe, matatag sa No. 1

Pinatunayan ni Senador Grace Poe ang linyang ‘strong independent woman’ makaraang muling dominahin ang pinakahuling survey ng Social Weather Station (SWS) para sa mga tatakbo sa posisyon sa Senado.

Maliban kay Sen. Poe, nagpakita rin ng pag-angat sa survey ang isa sa pambato ng administrasyong Duterte na si dating Special Assistant to the President (SAP) Bong Go gayundin ang mga reelectionist na sina Sen. Sonny Angara at Bam Aquino.

Alinsunod sa survey na ginawa ng SWS mula Pebrero 25-28, 2019 nakuha ni Poe, tumatakbong independent candidate, ang 68% boto ng mga respondent.

Sinundan siya ni Senador Cynthia Villar na may 61%. Habang mula sa dating puwesto na ikalima hanggang ikaanim, umangat si Bong Go sa ikatlo sa listahan at nakakuha ng 47%.

Nanatili sa pang-apat si Senador Pia Cayetano, 43%, na sinundan ni dating Senador Lito Lapid, 41%. Pasok din sa Magic 12 sina Senador Sonny Angara, 40%, at Nancy Binay, 37%.

Umangat sa pangwalo hanggang pangsiyam mula sa pang-12 si dating Senador Jinggoy Estrada, 36%, tabla kay Mar Roxas.

Sinundan sila nina Senador Bam Aquino, dating Senador Bong Revilla, at dating PNP chief Bato Dela Rosa, na may 34%.

Ayon kay STORM Consultants strategist Perry Callanta, mahirap talagang tibagin sa pangunguna sa mga survey si Sen. Poe dahil may mahika pa rin an gang ama nitong si Fernando Poe Jr. o FPJ.

“Kahit sino ang tanungin mo, malakas talaga si Sen. Poe dahil sa ‘FPJ Magic’ lalo’t pinaniniwalaang nadaya ito sa halalan nong 2004,” diin ni Callanta. “Kaya nga malakas din sa mga survey si Lito Lapid dahil sa kanyang papel sa ‘Probinsiyano’ ng ABS-CBN.”