OJT dapat suwelduhan – Grace Poe

Isusulong ni Senador Grace Poe ang pagbibigay ng sahod o mini­mum wage sa mga estudyante na nasa on-the-job training (OJT) sa iba’t ibang tanggapan ng pamahalaan.

Sinabi ni Poe, chairperson ng Senate committee on public servi­ces, na nakapaloob ang OJT salary sa panukalang ihahain niya na magtatakda ng internship program para sa lahat ng mga tanggapan ng gobyerno.

Ayon kay Poe, dapat na suwelduhan ang mga estudyante kahit na nag-aaral pa lamang dahil tumutulong na sila sa kompanya o tanggapan ng pamahalaan habang pinahuhusay ang kanilang kakayahan.

Base sa ­Department of Labor and Employment (DOLE), idiniin ni Poe na noong 2018 ay umabot sa 75.2% o 1.73 ­milyon ang mga walang ­trabaho na nasa edad 15 hanggang 34-anyos.

Tiwala si Poe na ang ihahain niyang panukala ay tutugon sa ma­laking bilang ng mga walang trabaho mula sa hanay ng kabataan

KAMPO NI GO, NAG-RELEASE NG PEKENG SURVEY RESULT

SWS nagbabala sa fake survey

Pinaalalahanan ng Social Weather Stations (SWS) ang publiko na mag-ingat sa mga lumalabas na pekeng SWS surveys lalo na nga at nalalapit na ang halalan sa Mayo.

“[SWS] again reminds the public that false reportage about SWS surveys is very common in the period leading up to an election,” ayon sa mensahe ng SWS sa kanilang official website, 10:38 ng gabi nitong Marso 7.

“Everyone is enjoined to rely only on the SWS website (www.sws.org.ph) for its advisories, announcements, and survey reports released to the public,” dagdag pa nito.

Ginawa ng SWS ang paalala sa publiko matapos lumabas ang sinasabing SWS survey na isinagawa noong Pebrero 25 hanggang 28.

Nang kapanayamin ng MindaNews, sinabi ni SWS President Mahar Mangahas na hindi sa kanila ang lumabas na survey at tanging sa opisyal na website lamang sila naglalabas ng kanilang mga isinagawang survey.

“It is unethical for you to use anything that is not on our website…Do not gratify propagandists who cannot back up their claims. Ask whoever released it to justify the release; whoever publishes something is legally bound to conform to Comelec full-disclosure rules on election survey publication,” sagot ni Mangahas nang kapanayamin ng Mindanews.

Binigyang diin tuloy ng SWS na marami talagang isinasagawang survey ang iba’t ibang grupo patungong halalan sa Mayo 13 na karamihan tuloy dito ang hindi legitimate ang operasyon.

Base sa pekeng SWS survey result, nanatiling nangunguna si Senadora Grace Poe na normal naman talagang nangunguna hindi lang sa SWS survey kundi maging sa Pulse Asia at sa higanteng RMN Stations Election Survey 2019.

At ayon pa rin sa pekeng SWS survey bagamat nanatiling nasa pangalawang puwesto ang isa pang reeleksiyonistang si Senadora Cynthia Villar, kapansin-pansin na inokupahan na ni dating Special Assistant to the President Bong Go ang pangatlong spot.

Batay naman sa ulat ng Philippine Center for Investigative Journalism noong nakaraang buwan, si Go ang may pinakamalaking ginastos para sa pre-election campaign advertisements mula Enero 2018 hanggang Enero 2019.

Sa kabuuang 61 kandidato para senador, gumastos na si Go ng P422.5 milyon samantalang mayroon lamang siyang deklaradong net worth na P12.85 milyon.

Naglabas din ang kampo ni Go na “this reflects a continuous improvement from his 5th to 6th place ranking with 41 percent conducted by the same survey firm (on) January 23-26, 2019 and coming from a 15th-16th ranking back in December 2018.”

Samantalang hindi rin lumabas ang nasabing January 23-26 “SWS survey” sa mismong SWS website.

Para mahingan ng komento hinggil sa sinabi ni Mangahas, tinanong ng MindaNews si Go at sumagot ang dating opisyal na “Ask mo sino naglabas po.”

Nagpaliwanag ang MindaNews na ang kampo niya ang nagbigay sa kanila ng kaduda-dudang survey results sa pamamagitan ng press release na ipinadala sa kanilang e-mail at Viber group.

“No comment na ako. Nagpasalamat na ‘ko,” sabi naman ni Go.

Nagbabala ang SWS na mag-ingat sa mga survey interviewer na nagpapanggap na nagtatrabaho sa kanilang kompanya.

“SWS interviewers while on fieldwork wear a valid ID which clearly shows the logo and name Social Weather Stations, the interviewer name and signature, validity period of the ID, and name and signature of an SWS officer,” ayon sa SWS website.

Hinimok din nila na para makumpirma kung totoo ang SWS interviewers, tumawag lamang sa kanilang tanggapa sa 02-9264308; 02-9244456; 02-9244465 at hanapin si Josefina Tayactac o sa kanilang mobile pone 09999913518, fax number 02-9202181 o email address na sws_info@sws.org.ph.

Pilipinas, mababaon sa kumunoy ng pautang

Maraming bansa sa buong mundo ang nagdadadalawang-isip sa alok na pautang ng China na malaki ang tubo tulad ng inilaang P4.37 billion para sa Chico River Dam Irrigation Project na nilagdaan ng mga opisyal ng Beijing at Maynila.

Pinondohan ng China Exim Bank at ginagawa ang konstruksiyon ng China CAMC Engineering Co. Ltd. Beijing na gumagamit ng manggawang Chinese sa proyekto.

Ang masama, napakalaki ng tubo ng China-funded projects sa antas na 2-3 porsiyento, 1,100 porsiyentong mas mahal kaysa pautang ng Japan na nasa antas lamang ng 0.25-0.75 porsiyento.

Ayon sa Washington-based Center for Global Development, isang nonprofit research organization, ang mga bansang hindi makababayad ng utang ay “hawak sa leeg” ng China tulad ng nangyari sa mga bansanf Djibouti, Kyrgyzstan, Laos, Maldives, Mongolia, Montenegro, Pakistan at Tajikistan.

Hindi nababahala sa “debt-trap diplomacy” ng China ang mga opisyal ng pamahalaang Duterte basta matulo lamang ang “Build, Build, Build”  program ng gobyerno.

Ikinatwiran no Socioeconomic Planning Secretary Ernesto  Pernia na hindi makukuhang lahat ng Pilipinas ang pangangailangan sa pondo mula sa Japan kaya kapat sa patalim ang bansa sa pag-utang sa China.

 “Between 2 percent and 3 percent interest rate is still much better than commercial loans,” sabi ni Pernia. “We don’t want to be left behind”

Masyadong nagmamadali ang administrasyong Duterte sa mga proyektong inasahang mabilis na magpapaunlad sa bansa ngunit sa kalaunan ay mababaon sa kumunoy ng utang ang sambayanang Pilipino.

Travel pa more, isinulong ni Sen Poe sa expanded student fare discoun

Inihayag ni Sen. Grace Poe na makakakuha ng diskuwento sa eroplano ang mga estudyante kapag nilagdaan ni Pangulong Duterte ang Senate Bill No. 1597 o ang panukala niyang Student Fare Discount Act

“Ang isang batas na isinusulong ko ang i-institutionalize ang 20-percent discount sa lahat ng estudyante hindi lamang sa jeep at bus kundi pati na rin sa eroplano kaya travel pa more,” sabi ni Poe kamakailan.

Si Poe ang co-author at co-sponsor ng Student Fare Discount Act na ini-reconcile sa House Bill No. 8885 na inaprubahan at naghihintay na lamang ng lagda ni Duterte.
Kapag batas na, lahat ng estudyanteng Pilipino mula elementarya at kolehiyo kabilang ang nasa technical at vocational schools ay makakakuha ng 20 porsiyentong diskuwento sa mga bus, jeepneys, taxis, tricycles, transport network vehicle services, shuttle services, railway services, gayundin sa  airline at passenger ships kahit weekends at holidays.
“Isa ako sa nagsusulong ng mga proyekto para sa kapakanan ng mga estudyante at iba pang nangangailangan ng tulong,” diin ni Poe.
Si Poe rin ang pangunahing awtor ng batas na nag-aalis ng government fees  sa pre-employment documents tulad ng police clearance, National Bureau of Investigation (NBI) clearance at tax identification number.

“Para sa first time graduates, ang lahat ng government permits ninyo—NBI clearance, barangay clearance etc. ay libre na dahil sa aking panukalang batas,” dagdag ni Poe.

Industriya ng bigas, dapat pang palakasin—Sen. Grace Poe

Naniniwala si Senadora Grace Poe na kahit inamin ni Pangulong Rodrigo Roa Duterte na habambuhay na tayong aangkat ng bigas ay magagawa pa ring makabangon ang ating mga magsasaka para magkaroon tayong ng rice sufficiency sa hinaharap.

Inihayag ni Duterte na habambuhay nang aangkat ng bigas ang Filipinas mula sa mga karatig-bansa sa mga nagsidalo sa  1st National Assembly ng Liga ng mga Barangay sa Pilipinas sa Pasay City kamakailan.

Ayon kay Duterte, nakaaapekto sa produksiyon ng bigas ang kapayapaan at food security  lalo’t nakadepende sa agricultural production ng Mindanao ang self-sufficiency ng bansa sa pagkain.

Sa pahayag mula sa Zambonga City nitong Pebrero 26, idiniin ni Poe na dapat panatilihin ang National Food Authority (NFA) na bibili ng produktong palay ng ating mga magsasaka at dapat palakasin ang mekanisasyon sa pagsasaka na tiniyak sa Rice Tariffication Law.

Diin ni Poe: “Mayroon naman talagang dapat na safety nets, like NFA will remain there precisely to still buy from our farmers but this time, because of the money that the government can subsidize the farmers with, hopefully makakapagkumpitensiya ang mga farmers natin sa mekanisasyon, ‘yun ang talo tayo. Kaya hanggang ngayon kung makikita mo, libre nga ang irigasyon pero hindi naaabot ng tubig kasi kulang pa rin tayo sa distribution facility so hopefully mabantayan nang hindi kurakutin ang pera at dumiretso sa mga magsasaka dahil kapag dumiretso ‘yan, I’m almost sure that our farmers can be more competitive.”

Hindi rin naniniwala si Agriculture Secretary Manny Piñol sa pahayag ni Duterte kaya nasa poder niya ang pagpapatupad ng mga programa sa bagong batas upang mapalakas ang industriya ng bigas at mapaniwala ang Punong Ehekutibo na umaangat ang rice production sa bansa sa antas na 3.5 porsiyento kada taon.

Sa katunayan, ani Piñol, ay lumalago pa ang rice industry ng bansa

“In-accurate ‘yung ibinigay sa kanyang info sapagkat ang totoo niyan ang rice industry in the Philippines has been growing at the rate of 3.5 percent per year, actually ang sinabi niya hindi raw natin ma-a-achieve ‘yung rice sufficiency, sinabi ko rin sa kanya ‘yan eh, ang sabi ko, actually, sir, maski i-implement natin sa programa na ito, the longest that we can actually achieve rice sufficiency would be 1-2 years sapagkat aabutan tayo ng population growth,” dagdag ng kalihim.

Taga-Tondo, todo suporta sa mga aksiyon ni Sen. Poe

Sa unang araw ng pangangampanya ni Senadora Grace Poe, pinili niya ang Tondo sa Maynila bilang opisyal na pook ng kanyang proclamation rally noong nakaraang Miyerkules sa tangka niyang muling makapaglingkod sa Senado sa ikalawang termino.

Kasama ang mga kapwa reeleksiyonista, inilatag ni Poe ang kanyang plataporma at mga batas na naisakatuparan dulot ng kanyang matapat na paglilingkod sa taong bayan.

“Muli kong inaalay ang aking sarili para maglingkod sa inyo sa Senado dahil marami tayong nasimulan na gusto nating ipagpatuloy,” pahayag ni Poe sa harap ng libo-libong taga-Tondo na dumumog sa kanilang proclamation rally.

Inihalimbawa pa ng senadora ang kanyang marubdob na paglilingkod sa mga aral na itinuro ng kanyang yumaong ama at Hari ng Pelikulang Pilipino na si Fernando Poe Jr. “Sa pelikula ni FPJ, kapag napasadahan na ng suntok ang mga siga at sanggano, kapag namatay na ang kontrabida, tapos na ang sine. Sa ating bansa, hindi pa nauubos ang mga magnanakaw, ang mga nagsasamantala, ang mga nakanganga at manhid sa paghihirap ng kapwa. Hindi pa tapos ang laban,” ani Poe na consistent Number 1 sa mga elections survey na lumalabas.

Hiniling din ni Poe na muli siyang pagbigyan ng masang Pilipino upang maipagpatuloy niya ang mga nasimulang pakikibaka para sa kaunlaran at ikabubuti ng buong sambayanan.

“Hinihingi ko ang inyong suporta para sa ikalawang termino natin sa Senado para tapusin ang ating mga nasimulan, para ituloy ang aksiyon para sa kapakanan ng mga kabataan, kababaihan, mga mananakay at karaniwang konsumer. Ako po si Grace Poe, at tuloy Poe ang aksiyon sa Senado para makapaglingkod sa inyo,” pagwawakas ni Poe.

Grace Poe, matatag sa No. 1 sa Pulse Asia survey

NANGUNGUNA pa rin sa pinakapinipi­ling kandidato sa pagka-senador ang reeleksiyonistang si Sen. Grace Poe, batay sa bagong survey na isinagawa ng Pulse Asia para sa nalalapit na 2019 elections.

Nakakuha ng 74.9 porsiyentong (%) vote preference si Poe at hindi natinag sa unang posisyon ng listahan ng mga kumakandidatong senador.

Malayo naman ang agwat ng sumunod kay Poe na si Sen. Cynthia Villar na nakakuha ng 60.5% ng boto mula sa mga tinanong..

Sumunod kina Poe at Villar ang mga nagbabalik sa Senado na sina Taguig City Rep. Pia Cayetano at da­ting senador Lito Lapid na statistically tied sa ikatlo hanggang ikaanim na puwesto sa natamong 53.3% at 53% na sinundan din ni Sen. Nancy Binay (50.1%)

Pasok sa Magic 12 sina Sen. ­Edgardo ‘Sonny’ Angara (48.8%), Sen. Koko Pimentel (45.5%), Bong Go (44.7%), Jinggoy Estrada (44.3%), Mar Roxas (41.8%), Ilocos Rep. Imee Marcos (41.2%), ­dating senador Bong Revilla (40.2%), Sen. Bam Aquino (38.5%), dating senador Serge Osmeña (37.7%) at dating Police Chief Bato Dela Rosa (36.9%).

Isinagawa ang survey simula ­Enero 26-31, 2019 sa may 1,800 respondents.

Sinabi naman ng political strategist Perry Callanta na mahirap na talagang bakbakin si Poe  sa pagiging No. 1 sa mga survey dahil sa kanyang ipinakitang political will sa malalaking isyu tulad ng pag-iisa niya sa Senado na hindi pagpayag na ibaba ang minimum age of criminal responsibility mula sa 15-anyos.

“Kita naman natin na nang una siyang tumakbo sa Senado noong 2013 ay nanguna siya sa botong mahigit 20 milyon,” ani Callanta. “Nakakatulong kay Poe hanggang ngayon ang ‘FPJ Magic’ dahil simbolo siya ng laban ng kanyang amang si Fernando Poe, Jr. na nadaya sa pamamagitan ng dagdag-bawas nang tumakbo itong pangulo noong 2004.”

Chinese stude na nambato ng taho sa pulis, kinasuhan ng direct assault

Inaprubahan nang isang piskal ang kasong direct assault kontra sa dayuhang estudyante na nambato ng taho sa pulis na nakatalaga sa Boni Avenue station ng Metro Rail Transit-3 (MRT-3).

Sa isang pahinang resolusyon, inirekomenda ni Senior Assistant City Prosecutor Leynard Dumlao na kasuhan ang Chinese student na si Zhang Jiale ng direct assault.

Aprubado naman kay City Prosecutor Bernabe Augustus Solis ang ginawang rekomendasyon ni Dumlao.

Ayon kay Dumlao, nakitaan niya ng probable cause upang kasuhan si Zhang dahil sa ipinakita nitong seryosong karakter na isang indikasyon ng determinasyon ng respondent para labagin ang batas at mga kinatawan nito.

Tinukoy din ng piskal ang ginawang pambabato ni Zhang ng plastic cup na may taho kay PO1 William Cristobal, na kasalukuyang naka-duty sa Boni Ave. station.

“Ang ginawa niyang pagkilos ay kinokonsidera nating sinadya at seryosong pakikipaglaban sa isang pulis na tinutupad lamang ang kanyang tungkulin ng mga oras na iyon,” wika ni Dumlao.

“It is offensive both by legal and moral norm considering that there was no provocation on the part of the police officers,” dagdag pa ng piskal ng Mandaluyong.

Gayunman, ibinasura naman ni Dumlao ang reklamo ng disobedience at unjust vexation dahil nakapaloob na rin ito sa kasong direct assault.

Base sa Article 148 ng Revised Penal Code, maaaring makulong ang sinumang kasuhan ng direct assault ng medium hanggang maximum prision correccional o katumbas ng walo hanggang 12 taon at magmumulta rin ng P1,000.

Pinag-aaralan na rin ng Bureau of Immigration (BI) na kasuhan ng deportasyon si Zhang para dalhin sa BI Board of Commissioners na magdedesisyon ng kasong ito.

 

Kung made-deport, mapapabilang na si Zhang sa BI watchlist.

Labis naman ngayon ang paghingi ng paumanhin ni Zhang, na nag-aaral ng fashion design at anim na taon nang naninirahan sa bansa, at hiniling na mabigyan siya ng panibagong pagkakataon.

“I’m really in bad mood and I was not able to control my emotion. I really admit the mistake I made and I feel so regretful. I’m really really sorry. And I really ask if it’s possible to have another chance for me,” sabi ni Zhang.

Talagang nasa huli ang pagsisisi, tsk, tsk.

Grace Poe, kahanga-hanga sa pagsusulong sa mga kabataan

Tunay na kapuri-puri ang pagpapahalaga ni Senadora Grace Poe sa mga bata at kabataan ng ating bansa kaya naman siya ang laging nangunguna sa pitong survey hanggang nitong Enero.

Iginiit ni Sen. Poe ang lubos na pagpapatupad ng iniakda niyang Masustansyang Pagkain Para sa Batang Pilipino Act para sa malinis masustansiya, masarap, at mainit na tanghaliang libre sa mga bata sa public schools sa buong bansa..

“Pagmamahal sa mga bata, natutuhan ko iyan sa aking ama (Fernando Poe Jr.)  kaya isa sa batas na ipinasa natin sa Senado ay tulong para sa kinabukasan nila,” ani Poe kaugnay Republic Act No. 11037 o National Child Feeding Law para sa mga mag-aaral sa elementarya sa pampublikong paaralan.

Para kay Poe, wala dapat gutom na bata sa mga paaralang elementarya sa buong bansa kaya una niya itong ipinanukala sa Senado at naging batas nang lagdaan ni Pangulong Rodrigo Duterte noong Hunyo 20, 2018.

Dagdag ni Poe: “Kaya nga sa unang araw ko sa Senado, itinulak ko ang pagpasa ng batas na ito dahil walang kapatawaran kung hindi nating matutugunan ang pagkagutom ng mga batang mag-aaral. Ang libre at masustansiyang pagkain para sa kanilang anak ay makapagpapagaan sa dalahin ng mahihirap na pamilya sa buong bansa.”

Kaya nga laking pasasalamat ni Sen. Poe sa kanyang ama na si FPJ na naging adbokasiya rin noong nabubuhay pa ang iniakda niyang First 1000 Days na magpapalakas sa nutrisyon ng lahat ng bata sa unang 1,000 araw ng kanilang buhay.

Tinawag ding Kalusugan at Nutrisyon ng Mag-Nanay Act, ang Republic Act 11148 ay nilagdaan ni Pangulong Rodrigo Duterte noong nakaraang Nobyembre 29.

Idiniin ni Poe na sa RA 11148 ay mapagkakalooban ng wastong pag-aaruga ng ina ang lahat ng sanggol sa ating bansa sa ilalim ng child health care program upang mahadlangan ang pagkabansot at malnutrisyon ng mga bata.

“Sa wakas, batas na ang ating pet legislation, ang First 1000 Days! Para ito sa lahat ng ina at bata, ngayon at sa mga susunod na henerasyon. Thank you, Lord, at sa lahat ng nakipagtulungan para matupad ang pangarap nating ito para sa ating mga kababaihan at kabataan,” sabi ni Poe sa kanyang Facebook page.

“Iniaalay ko sa alaala ng aking amang si FPJ ang pet bill kong ito na inaatasan ang pamahalaan na gawing prioridad ang nutrisyon ng mga buntis at nagpapasusong mga ina, lahat ng sanggol at mga bata,” ani Poe. “Alam kong masaya ang aking ama sa kabilang buhay dahil ito ang ipinangako niya nang tumakbong Presidente noong 2004.”

Patuloy na isinusulong ni Sen. Poe ang karapatan ng mga bata at kabataan kaya kahit nag-iisa siya sa paninindigan sa Senado na hindi dapat ibaba ang minimum age of criminal responsibility mula sa 15-anyos ay ipinagdiniinan niya ito.

Kaya lubos na kahanga-hanga si Sen. Poe sa kanyang pagtangkilik sa mga kabataan sa ating bansa at walang dudang siya ang mangunguna sa halalan para sa Senado sa Mayo 13 dahil iboboto siya ng kanyang kinakalinga—ang mga kabataan sa buong bansa.

Lipat-pagmamay-ari ng Mislatel sa Dennis Uy consortium, OK na

Inaprubahan ng Senado ang paglilipat ng pagmama-ari ng Mindanao Islamic Telephone Company (Mislatel Company) tungo sa Mislatel consortium na pinangungunahan ng mga kompanya ng negosyanteng tubong Davao City na si Dennis Uy at ng China state-owned China Telecom.

Kinatigan ng Senado ang House Concurrent Resolution No. 23 para sa pagbebenta ng controlling interest ng Mislatel sa Udenna Corporation, Chelsea Holdings Corp. at China Telecommunications. Corp.

Nabatid na may 35% shares ang Udenna, 25% ang Chelsea at 40% ang China Telecom sa consortium habang ang Mislatel ang franchise holder.

Magsisilbi itong go-signal para ipagpatuloy ng Mislatel consortium ang operasyon bilang provisional third telecommunications (telco) player.

Bumoto kontra sa pag-apruba ng resolusyon sina Senate Minority Leader Franklin Drilon, Sen. Risa Hontiveros at Sen. Panfilo Lacson.

Sinabi ni Sen. Grace Poe, chairman ng Senate committee on public services, na nagsagawa ng apat na pagdinig sa isyu, na hindi pa matatawag na bagong major telco ang Mislatel consortium dahil malaya ang sinuman na kuwestiyunin sa korte ang prangkisa nito.

“We took out anything that  pertains to calling Mislaterl a new major player or third telco. We’re treating it as a regular franchise because later on, someone might go to the court and say Congresss recognized Mislatel as the third telco,” ani Poe.

“Inendorso ko ang resolusyon dahil desperado ang publiko na magkaroon ng ikatlong telco na nangangako ng mura at mabuting serbisyo,” dagdag ni Poe.

Matatandaang nakuwestiyon ng ilang senador ang bisa ng prangkisa ng Mislatel dahil hindi ito kailanman nagbukas ng operasyon mula nang mabigyan ng prangkisa ng Kongreso noong 1998.