Negosyong Intsik na hindi tumatanggap ng Pinoy, isara – Lacson

Hinimok ni Senador Panfilo Lacson ang gobyerno na isara ang mga restoran at iba pang establisimyentong tanging mga Chinese lamang ang pinapapasok o pinagsisilbihan sa ating sariling bayan.

Nanawagan din si Lacson sa Department of Trade and Industry (DTI), lokal na pamahalaan at iba pang mga ahensiya para gamitin ng mga ito ang kanilang awtoridad at huwag papasukin ang mga mamumuhunang Intsik sa mga small- and medium-sized enterprises (SMEs).

“We should prioritize Filipino entrepreneurs,” pahayag ni Lacson sa panayam sa radyo. “If investors coming from China would do business even in SMEs, that will be alarming because many of our countrymen will be deprived of investment opportunities.”.

Idinagdag pa ng senador na hindi masama kung papasok ang mga negosyanteng Intsik na magdadala ng bilyon-bilyong puhunan sa bansa dahil makatutulong ito sa ating ekonomiya ngunit nakapag-aalala na kung papasukin pa rin ng mga dayuhan ang maliliit na negosyo.

“What’s worrisome is if the Chinese investors would … compete in running variety stores, restaurants and merchandising, which only require small investment money,” ani Lacson.

Ginawa ng senador ang pahayag matapos batikosin ng mga netizen sa social media ang isang restorang China Food City sa Alabang, Muntinlupa City ang nagbabawal sa mga Filipino na pumasok sa loob ng compound dahil tanging mga Intsik na empleado lamang na nagtatrabaho sa katabing online gaming companies ang kanilang pinagsisilbihan.

May mga ulat pang ilang convenience stores na pag-aari ng mga Intsik sa lungsod ng Makati at Pasay ang hindi tumatanggap ng mga kustomer na Filipino.

Noong Abril, nagreklamo ang mga residente ng Boracay sa biglaang pagdami ng mga restorang Intsik sa main road ng pamosong resort island.

Walang menu na nakasulat sa Ingles o Filipino ang mga restoran at nakasulat lang sa Chinese. Bukod pa rito, pawang mga Intsik ang kanilang mga cook, cashier, waiters, laborers at drivers at tanging mga kapwa lamang nilang Intsik ang pinagsisilbihan.

“Try to go to China and put up a store that sells goods without Chinese [markings] and [are] exclusive[ly] for Filipinos. You will be deported [the next day],” kuwento ni Lacson.

Dapat aniyang magtulongan ang DTI, Department of Labor and Employment at Bureau of Immigration para magbuo ng task force upang malaman kung saan gumagawa ng negosyo ang mga dayuhang Intsik.

“They must closely scrutinize what kinds of investments are being brought here. I think they should discourage if the investment would deprive our countrymen the chance to make their lives better by having their own small business,” anang senador.  

Nag-upload ng ‘Bikoy’ videos, arestado ng NBI

Kinumpirma nitong Huwebes ng Department of Justice (DOJ) ang pagkakaaresto ng mga awtoridad sa indibidwal na hinihinalang nag-upload ng anonymous videos ng isang alyas “Bikoy” na tumukoy sa mga Duterte na sangkot sa ilegal na droga.

“It was the person who uploaded the video who was arrested for cybercrime, specifically cyberlibel,” pahayag ni Justice Undersecretary Mark Perete, DOJ spokesperson, sa mga mamamahayag.

Wala namang detalye ng pagkakaaresto ang isinapubliko sa ngayon habang naghihintay ang DOJ sa report ng National Bureau of Investigation (NBI).

Mahalaga ang ginagampanan ni “Bikoy” sa tinatawag na ouster plot “matrix” na inilabas ng Malacañang at nag-uugnay sa tatlong news organization at National Union of Peoples’ Lawyers na naglalayong patalsikin si Pangulong Rodrigo Duterte. Gayunman, sinabi ng pulisya at militar na wala silang namonitor ng anumang banta para mawala sa poder ang Pangulo.

Mariin namang itinanggi ng mga mamamahayag at ng NUPL ang alegasyon at sinabi pang nilikha ng  mismong Pangulo ang sinasabing matrix na maraming kamalian.

Noong Miyerkules, sinabi ni Presidential Spokesperson Salvador Panelo na hindi na kinakailangan pang patunayan ang katotohanan ng matrix.

“The matrix shows that there is an ouster plot. It is just a plot, a plan, an idea,” ani Panelo.

Cap sa power rate hikes, pinuri ng MKP

Malugod na tinanggap ng Murang Kuryente Partylist nitong Martes ang ginawang panukala ng Senate Committee on Energy para maglagay ng cap sa power rate hikes.

“Masyadong mataas ‘yung cap para sa mga konsumer, pero ito ay isang hakbang patungo sa nararapat,” sabi ni MKP second nominee at matagal nang energy advocate na si Gerry Arances.

Napagkasunduan kamakailan ng Senate Committee na pinangungunahan ni Senador Sherwin Gatchalian ang P6 per kilowatt-hour cap sa power rate increases.

Subalit iginiit ng partylist na unang hakbang pa lamang ito at dapat na baguhin ang mismong sistemang pinaiiral.

“‘Wag tayo tumigil diyan. Tama si Senador Gatchalian na ang polisiya natin sa koryente mismo ang may pagkukulang. Tignan natin ang EPIRA at baguhin ang dapat baguhin, para tagakonsumo naman ang makinabang,” diin ni Arances.

Ayon kay Arances, dapat ding parusahan ang mga generation companies (GenCos) dahil sa bigla o wala sa iskedyul na pagkawala ng koryente.

“Nabanggit sa hearing, at malinaw na malinaw – ang konsumer na ‘di makabayad nang mataas na singil sa koryente, mapuputulan at mapapatawan ng mga reconnection fees, pero ang GenCo na nasiraan ng planta at sanhi ng brownout, walang kailangang katakutan,” lahad pa ng energy advocate.

Sinabi pa ni Arances na dapat mag-ingat ang Senate Committee sa mga posibleng taktika ng mga energy company na gamitin ang banta ng pagkawala ng koryente upang mahimok ang pamahalaan na magtayo pa nang mas maraming power plant at sa kasunduang matatalo ang mga konsyumer.

“Tandaan natin na pabor sa kanila na magkaroon ng krisis sa koryente para mapilitan tayo na magbayad kung anuman ang singil nila. Dapat ipakita natin na mulat tayo sa mga galawan nila, at handa tayo na ipaglaban ang dapat para sa mga consumer,” dagdag ni Arances.

Patuloy pa rin ang pagkuwestiyon ng MKP sa mga distributor, generation company at kooperatiba sa industriya habang inaasam nilang maprotektahan ang mga konsumer sa pinakamasamang gawain ng mga ito.

Idinagdag pa ng partylist na pinagsasamantalahan ng mga distributor tulad ng Meralco at mga kooperatibang katulad ng Philreca ang mga tapat na konsumer.

“Kung hindi babaguhin ang sistema, hindi magbabago ang industriya. Noong isang araw lang, nagbadya ang Meralco ng kakulangan sa supply ng koryente hanggang sa Hunyo. Ang koryente, serbisyo at hindi negosyo. Dapat hindi mga negosyante ang nagtatakda ng mga polisiya at presyo nito,” ani Arances.

DFA humingi ng tulong para sa absentee voting

Halos wala nang tinatanggap na ayuda ang mga foreign service worker na naghihintay ng kanilang naantalang badyet para sa overseas absentee voting (OAV), ayon kay Foreign Affairs Secretary Teodoro Locsin Jr.

“I know the sacrifices you are making so overseas Filipinos can vote and how little help you are getting. One of you advanced $10,000 to make sure ballots are delivered,” sabi ni Locsin sa kanyang Twitter.

“I am so proud of you and so ashamed of the little help. My gratitude is boundless,” dagdag pa ng kalihim.

Naunang ipinarating ng mga overseas Filipino worker (OFW) na hindi pa dumadating ang kanilang mga balota dalawang lingo makalipas ang pagsisimula ng OAV noong Abril 13.

Ipinabatid naman ng Commission on Elections (Comelec) na naantala sila dahil sa pagbili ng postage stamps dulot naman ng mabagal na pag-apruba sa 2019 national budget.

“The DFA is confident that the Comelec will be able to provide the necessary resources to enable an honest, fair and credible elections overseas. In the interest of time, the DFA has authorized the concerned Foreign Service Posts to advance the cost of the remaining postage fees in order to bridge the funding gap while awaiting the remittance from the Comelec,” pahayag ng DFA.

Ipagpapatuloy din ng DFA ang pakikipagkoordinasyon nila sa Comelec upang mapabilis ang pagproseso ng OAV.

Para sa senatorial at party-list elections, may dalawang paraan ang DFA para sa OAV: personal voting, kung saan magtutungo ang botante sa embahada ng Pilipinas at Consulate General; at postal voting, kung saan ipadadala ng embahada at Consulate General ang official ballot sa botante, na ikokoreo pabalik ang dokumento sa nasabing pasilidad.  

Dapat makipag-usap tayo sa China — Duterte

Matapos ang babala ni Pangulong Rodrigo Duterte sa China na huwag gagalawin ang Pag-asa Island bunsod ng agresibong pagkilos nito sa West Philippine Sea, muli na namang nagbago ang pakikitungo ng Punong Ehekutibo sa higanteng bansa at mas pinili na namang daanin sa negosasyon ang hindi pagkakaunawaan ng dalawang bansa.

Iginiit ni Duterte, na inaakusahan ng ilang grupo na hindi pinagtitibay ang maritime claims ng Pilipinas, na hindi maaaring magtagumpay ang bansa kontra China sa digmaan.

“We can’t defeat them. So let’s stick to just talking unless you want me to say, ‘OK, I’ll attack China. Who’s with me?’ Will America join us? They can’t even resolve their problem with Iraq and Iran in the Middle East. They’ve been at war for a long time. But who won it? Nobody. Many lives were lost including those of civilians, children, the elderly and women. That’s the story,” pahayag ng Pangulo sa campaign rally ng PDP-Laban sa Davao kamakalawa ng gabi.

Inismiran lang ni Duterte ang hamon ng kanyang mga kritiko na bisitahin ang ilang lugar sa West Philippine Sea na inokupahan nang mga Chinese.

“They want me to visit it. It’s fine, it can be done just to show off. But we would all be destroyed. And my soldiers and my policemen will be massacred,” anang Pangulo.

Hindi malinaw kung babanggitin ni Duterte ang isyu sa West Philippine Sea kay Chinese President Xi Jinping kapag nagpulong sila sa Second Belt and Road Forum sa Beijing.

Sinabi pa ni Duterte na ang sinundan niyang si Benigno Aquino III ang walang ginawa sa reclamation activities ng China sa West Philippine Sea.

“America also did not do anything. And now that it has been completed and that there is already a camp there and there are armaments and they want me to go there. Now it’s almost complete. It looks like a real camp. They have guns,” anang Pangulo.

Makalipas ang mahabang panahong pagbibigay sa China, nagbago ang tono ni Duterte kamakailan at sinabihang huwag galawin ang Pag-asa Island na okupado ng puwersang Filipino.

Grace Poe, lagare sa kampanya kahit No. 1

Tuloy ang pukpukang kampanya ni Senadora Grace Poe kahit hindi ito matibag sa number one spot ng mga pre-election survey.

Sinabi ni Poe na marami pa siyang lugar na kailangang suyurin sa nalalabing isang buwan ng kampanya bago ang May 13 midterm elections.

“‘Yung mga gusto kong puntahan sa kampanya na ‘to marami pang lugar, sa Mindanao, sa Visayas at mga liblib na lugar sa Luzon,” ayon sa senadora.

Ani Poe, magpapahinga lamang siya sa panahon ng Semana Santa upang sumama sa tradisyunal na ginagawa ng kanilang pamilya na Visita Iglesia.

“Dito lang sa bahay kasama ng pamilya ko, ‘yung traditional na ginagawa namin, Visita Iglesia; pero hindi ako makakabakasyon hangga’t hindi matapos ang kampanya,” dagdag ni Poe.

Sa March 2019 survey ng Pulse Asia, nama­yagpag si Poe sa number one spot at malaki ang lamang sa pumapangalawang kandidato.

“Ang survey naman paiba-iba ‘yan. So sa tingin ko ang edge na lang natin kung anuman ang nagawa natin sa Senado. At hindi ko ipagkakaila, siyempre si FPJ pa rin. ‘Yung ang naaalala ng mga tao lalo na ang mga nasa probinsiya; very sentimental ang mga tao roon,” paliwanag pa ni Poe.

Narco celebrities, gustong ibulgar ng PNP

Kung si Philippine National Police (PNP) Chief Gen. Oscar Albayalde ang tatanungin, mas nanaisin niyang ilabas ang pangalan ng mga artistang nauugnay sa ilegal na droga at napabilang sa drug watchlist.

Sa panayam kay Albayalde, dapat lang aniya na matukoy kung sino sa mga celebrity na nasasangkot sa illegal drug trades kagaya nang nais ng PNP chief noong ilabas ang talaan ng narco politicians.

Iginiit ni Albayalde na nasa desisyon ito ngayon ng Philippine Drug Enforcement Agency (PDEA), Department of the Interior and Local Government (DILG) at ng Office of the President.

Naunang ipinabatid ni PDEA director general Aaron Aquino na kasama sa 31 celebrities gayundin ang 11 aktres ang nasa drug watchlist.

Hindi naman sumasang-ayon si Aquino na ilantad ang mga pangalan ng artista dahil nais nilang matiyak kung gaano katotoo ang impormasyon.

Idinagdag naman ni Albayalde na iniipon pa nila ang mga ebidensiya laban sa mga nasabing artista bago sampahan ng kaso.

Noon pa mang nakapuwesto siya bilang National Capital Region Police Office director, sinabi ni Albayalde na mayroon nang 50 artista ang nasa kanilang watchlist.

Nagbabala rin ang Malacañang sa mga artistang nasa druglist na itigil na nila ang kanilang mga ilegal na aktibidad bago sila hulihin.

Hinimok naman ni Senate President Vicente Sotto III ang PDEA na isapubliko na ang nasabing celebrity watchlist.

“I’m in favor of releasing the list, but it should be validated. Take note that the term ‘celebrities’ refers to not only showbiz people but also basketball players and other public figures,” sabi ni Sotto.